Monday, January 15, 2018

ඇයි

ඔහු පුටුවෙන් නැගිට දොර හැර මොහොතකට කලින් දොරට ගසමින් සිටි අමුත්තා දෙස නොරිස්සුම්ව බලා මෙසේ ඇසුවේය.

"ඇයි?"

කිසි පිළිතුරක් නොදුන් අමුත්තා වැරෙන් ඔහු ගෙබිමේ වැටෙන ලෙස තල්ලු කර දමා තම ඉනේ සඟවාගෙන සිටි සයිලන්සරයක් සහිත පිස්තෝලය ගෙන ඔහුගේ හිස පසාරු කරගෙන යන පරිදි උණ්ඩ දෙකක් නිකුත් කළේය.ඇතිවූයේ කම්බි දැලකට ගල් දෙකක් වදින හඬක් පමණි.ඉන්පසු ඔහු මේසය වෙත ගොස් එහි ලාච්චු අදින්නට විය.මේසය මත ආමන්ත්‍රණයක් රහිත අවසන් නොකල ලිපියක් දුටු ඔහු එය කියවන්නට ගත්තේය.

"මෙය කියවන විට ඔබ මහත් කැළැඹීමකට හා චිත්‍ත වික්ෂේපයකට පත්වනු නොඅනුමාන බව මා හොඳ හැටි දනිමි. "ඇයි?" යන ප්‍රශ්නය නොනවත්වා නින්නාද වනු නියතය.
"ඇයි" යන ප්‍රශ්නයට මටද හේතුකාරණා නිශ්චිතවම කිව නොහැක.අමුතුවෙන් සංතෘෂ්ටියට හෝ දුක්ඛිතභාවයට පත්වීමට හේතූන් මෑතකදී මට නොතිබුණි.ඔබ ඇතුලු සියලු දෙනාම දුටු පරිදි මා කාලයක පටන් දක්වන ලද සැහැල්ලුව හුදු මායාවක් හෝ මවාපෑමක් නොවෙති.

නමුත් මම දිනෙන් දිනම අන්ධකාරයේ ගිලීයන හැඟුමකින් පෙලුනෙමි.එම හැඟුම නිසි ලෙස වචනාර්ථයෙන් අර්ථදැක්වීමට මා අපොහොසත්ය.ඔබ අනන්ත ගැඹුරක ගිලී යන ආකාරයක් සිහි නංවාගන්න.පිහිනීමට නොහැකි තරමට විඩාපත්වී එසේ නැතිනම් පිහිනීමට උවමනාවක් නොමැති ඔබ උඩුකුරුව ජල පෘෂ්ඨය මත වැටෙන ආලෝකය දෙස බලමින් ඔබේ පිටුපස තිබෙන අනන්ත ගැඹුර වෙත ගිලීයයි.ඉහළින් පෙනෙන ආලෝකය කෙමෙන් දුරස් වීමට ගනී.

මේ හැඟීම,මේ මහා ශූන්‍යත්වය තුලට මා ඇදී යන්නේ ඉසිලිය නොහැකි තරම් මන්දගාමීත්වයකිනි.එබැවින් මා මේ මොහොතේ තීරණයකට...."

ලියුම එතැනින් අවසන්ව තිබුණි.මේසය මත පෙති කිහිපයක් තිබූ කුප්පියක් විය.

1 comment:

  1. .....එබැවින් මා මේ මොහොතේ තීරණයකට එළඹීමට නොහැකිව වික්ෂිප්තව පසුවෙමි.කෙසේ නමුත් ඔබ මා වෙත පැමිනෙන බැව් මා දැන සිටියෙමි.ඒ පැමිණීමෙන් පශ්චිම ඔබ අතට පත්වන මෙයින්, මා ඔබට පවසමින් සිටින්නේ කුමක් ගැනද යන්න පවා මේ වන විට මගේ මතකයට නගා ගැන්ම උගහටය.එසේ වුවත්, ඔබ,මා යන වචනවල අර්ථ ශූන්‍යත්වය පවා මේ මොහොතේ මා පසු පස ඇති අන්ධකාරයටම මා ඇද දමන්නක් මෙනි.නමුදු එහිද වන මන්දගාමීත්වය කෙමෙන් කෙමෙන් මා,මා තුලම ඇති ආලෝකයකට බියෙන් පලා යන්නෙකුගේ තත්වයට මා පත් කොට ඇත.එසේම පෙරකී පරිදි,ඔබ මා වෙත එළඹුනු කල්හි පිළිතුරු නොදුන් "ඇයි?" යන්නට පිළිතුරු ඇගේ මරණයට පෙර, ඈ වෙත ලබා දෙන මෙන් ආයාචනා කරමි.ඔබේ "ඇයි?" යන්නට පිළිතුරුද ඇගෙන් ලබා ගත හැකි වේවායි පතමි.
    අවසන් වරට හමුවන විටත් කතා කරමින් සිටි ඇගේ නෙත් පැවසූයේ මුසාවන් බව ද මම දැන් වටහාගනිමින් සිටිමි.ඒ බැව් ඇයට පවසන මෙන්ද ඉල්ලමි.මා ගිලගනිමින් සිටි අන්ධකාරයෙන් මා නිදහස් කිරීම වෙනුවෙන් ඔබට ස්තූති කරමි.ඒ වෙනුවෙන්, මට අයිතිව තිබූ ඕනෑම දේයක් දැන් ඔබගේ අයිතිය යටතේ ඇති බව ද දන්වමි.
    ස්තූතියි.

    ReplyDelete